Skip to main content

Conas an fhoirm iarratais a líonadh isteach

Sula ndéana tú iarratas ar chomórtas:

  • Léigh an fógra comórtais

  • Déan a sheiceáil an bhfuil do chuntas EU Login socraithe i gceart. Féach Conas is féidir liom a fhíorú go bhfuil mo chuntas EU Login socraithe i gceart chun iarratas a dhéanamh trí Thairseach Aonair na nIarrthóirí?

  • Déan a chinntiú nár chruthaigh tú do chuntas EU Login trí úsáid a bhaint as roghanna tríú páirtí, cuir i gcás: eID, Facebook nó Google. Cuntais ina n-úsáidtear logáil isteach tríú páirtí, déanfar iad a bhac ar iarratas a dhéanamh ar chomórtais EPSO.

  • Tábhachtach: Caithfidh iarrthóirí a chinntiú go bhfuil rochtain acu ar Thairseach Aonair na nIarrthóirí agus ar an gcuntas ríomhphoist a d’úsáid siad chun a gcuntas EU Login a chruthú, agus go mbeidh an rochtain sin acu go dtí deireadh phróiseas an chomórtais/foilsiú an phainéil.
     

CÉIM 1 - Logáil isteach ar Thairseach Aonair na nIarrthóirí trí do chuntas EU Login.

Mura bhfuil cuntas EU Login agat, nó mura gcomhlíonann do chuntas reatha na riachtanais a bhfuil cur síos orthu thuas, beidh ort cuntas nua a chruthú sula leana tú ar aghaidh.

 

CÉIM 2 - Do phróifíl a nuashonrú

  1. Téigh go ‘Mo chuntas’ → ‘Mo phróifíl’
  2. Déan a sheiceáil go bhfuil do shonraí pearsanta ceart. Mura bhfuil:
  • Iarrthóirí inmheánacha: chun nuashonrú a iarraidh, déan teagmháil le do sheirbhís acmhainní daonna
  • Iarrthóirí seachtracha: chun nuashonrú a iarraidh, cliceáil ar ‘Iarraidh a dhéanamh do chuid sonraí pearsanta a nuashonrú’
  1. Más gá, cuir do chuid Sonraí Teagmhála Pearsanta in eagar trí chliceáil ar an réimse lena mbaineann agus an t-eolas nuashonraithe a shábháil
  2. Roghnaigh do shainroghanna úsáideora
  3. Náisiúntachtaí: cuir isteach náisiúntacht AE amháin ar a laghad
  • Cliceáil ‘Cuir isteach náisiúntachtaí’
  • Roghnaigh ón roghchlár anuas
  • Tá na dátaí tosaigh agus na dátaí deiridh roghnach
  • Cliceáil ‘Sábháil’
  • Cliceáil ‘Siar’
  1. Roghnaigh do shainroghanna iarratais
  2. Cliceáil ‘Sábháil’

 

CÉIM 3 - Do CV a chruthú

Ní gá duit do CV a líonadh isteach ach uair amháin, nó sábhálfar é i do phróifíl ar Thairseach Aonair na nIarrthóirí agus is féidir é a nuashonrú nó a athúsáid in iarratais amach anseo. Is féidir leat do CV a chomhlánú in aon cheann de 24 theanga oifigiúla an Aontais Eorpaigh. Má tá iarratas á dhéanamh agat den chéad uair trí Thairseach Aonair na nIarrthóirí, tabhair dóthain ama chun é a chur i gcrích go cúramach. Má tá iarratas déanta agat cheana ar chomórtas roimhe seo, is féidir leat do CV reatha a athúsáid agus a chur in eagar.

  • Téigh go ‘Mo chuntas’ → ‘Mo CV’, agus líon isteach do thaithí oibre, oideachas agus oiliúint, agus do scileanna teanga.
    • Má tá tú ag obair d’institiúid nó do chomhlacht de chuid an Aontais cheana féin, is féidir leat SYSPER a oscailt chun do thaithí a chóipeáil agus a ghreamú isteach i do CV.
  • Uaslódáil cóip de do chárta aitheantais nó de do phas, rud nach mór a bheith bailí ar an dáta deiridh is féidir iarratas a chur isteach. Má tá an doiciméad aitheantais a d’uaslódáil tú imithe in éag, ní dhéanfaidh sé sin difear do d’iarratas. Ní chaithfidh tú doiciméad aitheantais nua a sheoladh ach amháin má iarrtar sin ort.
  • Más gá duit cóip nua de do dhoiciméad aitheantais a chur isteach, cuir i gceangal í le roinn an doiciméid aitheantais i d’iarratas, sa bhreis ar an gceann atá uaslódáilte cheana féin.
    Ní gá dáta deiridh na bailíochta atá ar taispeáint san iarratas a nuashonrú. 
  • Is féidir leat naisc chuig leathanaigh ghréasáin a chur isteach i ranna éagsúla de do CV. Cliceáil ar shiombail an ghlais chun é a oscailt, cuir isteach an nasc, agus cuir faoi ghlas arís é.
  • Cliceáil ‘Sábháil’ ag deireadh na foirme gach uair a chuireann tú taifead le do CV.

Is féidir leat do CV a nuashonrú am ar bith. Déan a chinntiú go bhfuil sé cothrom le dáta agus tú ag déanamh iarratais. Má chuireann tú do CV in eagar tar éis duit iarratas a chur isteach, ní mór duit é a chur isteach arís roimh an sprioc-am ionas go mbeidh an leagan nua nasctha le d’iarratas. Lean na treoracha atá le fáil ar Thairseach Aonair na nIarrthóirí chun níos mó treorach a fháil i dtaobh do CV a bhainistiú agus a chur in eagar.
 

Taithí oibre

Cliceáil ‘Cuir isteach taithí oibre’ chun an méid seo a leanas a chur isteach:

  • Dátaí tosaigh agus deiridh na fostaíochta
  • Sonraí an fhostóra
  • Suíomh
  • Cur síos ar do chúraimí agus ar do fhreagrachtaí

 

sonraí taithí oibre le cur isteach 

 

Oideachas agus oiliúint

Cuir isteach sonraí faoin oideachas agus oiliúint atá faighte agat, mar shampla:

  • Teideal do dhioplóma nó do cháilíochta
  • Ainm na hinstitiúide nó na heagraíochta bronnta
  • Seoladh na hinstitiúide
  • Leibhéal cáilíochta a baineadh amach

 
Scileanna teanga

Cuir isteach do scileanna teanga agus léirigh do leibhéal lena n-aghaidh seo a leanas:

  • Labhairt
  • Scríobh
  • Léamh

Is féidir leat níos mó ná teanga amháin a chur isteach, agus ba cheart duit do mháthairtheanga a chur san áireamh i gcónaí.

 

Scileanna agus foilseacháin

Is féidir leat do chuid scileanna a chur leis trí úsáid a bhaint as creat an ‘Aicmithe Eorpaigh Scileanna, Inniúlachtaí, Cáilíochtaí agus Gairmeacha (ESCO)’ agus liostaigh do chuid foilseachán i do CV.


 

CÉIM 4 - An fhoirm iarratais a líonadh isteach

Cliceáil ar an roghchlár: ‘Comórtais’, roghnaigh an comórtas is suim leat agus líon isteach an fhoirm.

Is féidir leat an t-iarratas a shábháil mar dhréacht agus é a chríochnú agus a chur isteach níos déanaí. 

Ní chuirtear san áireamh aon iarratas nach gcuirtear isteach roimh an sprioc-am. Má bhíonn fadhb agat le d’iarratas, ní mór duit dul i dteagmháil le EPSO i bhfad roimh an sprioc-am le hiarratas a dhéanamh.

 

Incháilitheacht 

 

Dearbhaigh go gcomhlíonann tú na coinníollacha incháilitheachta ginearálta agus sonracha, mar atá sonraithe san fhógra comórtais, faoin sprioc-am le hiarratas a dhéanamh.    

Iarrthóirí nach gcomhlíonann na ceanglais incháilitheachta uile faoin sprioc-am le hiarratas a dhéanamh, níor cheart dóibh iarratas a dhéanamh.

 

 Sonraí clárúcháin

Roghnaigh na teangacha is mian leat a úsáid chun na trialacha a dhéanamh (Teanga 1, Teanga 2, etc.) i gcomhréir leis na ‘Teangacha a úsáidtear sa chomórtas seo’ san fhógra comórtais. Ní féidir na teangacha sin a athrú tar éis an sprioc-ama le hiarratas a dhéanamh.   
Is féidir an t-iarratas a líonadh isteach agus a chur isteach in aon cheann de 24 theanga oifigiúla an Aontais Eorpaigh.   
       

Dearbhaigh d’iarratas ar oiriúnaithe sonracha mar gheall ar mhíchumas nó riocht sláinte, a mbeadh socruithe réasúnta ag teastáil ina leith (i.e. oiriúnaithe) agus lean na treoracha san fhoirm iarratais. Tá tuilleadh sonraí le fáil ar na leathanaigh ghréasáin thiomnaithe.

     socruithe speisialta

 

Spreagadh agus buanna

Ní úsáidfear an t-eolas sa rannán ‘spreagadh agus buanna’ de d’iarratas le linn an phróisis roghnúcháin féin, ach ba cheart duit é a dhréachtú agus a fhios agat go n-aistreofar chuig na seirbhísí earcaíochta é má éiríonn leat spás a fháil ar an bpainéal ionadaithe. 

 
Dearbhú

Sula gcuirfidh tú isteach an fhoirm iarratais, ní mór duit a dhearbhú go bhfuil an t-eolas atá i d’iarratas iomlán agus ceart.

Is ceart d’iarrthóirí ar phost in institiúidí agus comhlachtaí an Aontais Eorpaigh gníomhú go sár-ionraic iontaofa, i gcomhréir le hAirteagal 27, an chéad mhír, agus le hAirteagal 28(c) de na Rialacháin Foirne. 

I gcás calaoise nó iarracht ar chalaois, féadfaidh EPSO cinneadh a dhéanamh a dhearbhú go bhfuil an t-iarrthóir neamh-incháilithe go ceann tréimhse ama teoranta do chomórtais a reáchtálfar ina dhiaidh sin.

 

CÉIM 5 - Do dhoiciméid tacaíochta a uaslódáil

  • Uaslódáil doiciméid a thacaíonn leis an eolas i d’iarratas (e.g. cruthúnas ar oideachas agus taithí ghairmiúil) faoin sprioc-am atá sonraithe san fhógra comórtais.
  • Ní mór doiciméad tacaíochta amháin ar a laghad a bheith i ngach iontráil sna ranna ‘Taithí oibre’ agus ‘Oideachas agus oiliúint’, agus é ceangailte trí shiombail an fháiscín páipéir sa chúinne ag an mbarr ar dheis. Ní chuirfear san áireamh iontrálacha gan doiciméid tacaíochta.
  • De ghnáth, ní bhíonn doiciméid tacaíochta ag teastáil le haghaidh scileanna teanga. Féach an fógra comórtais le haghaidh eisceachtaí (e.g. próifílí teanga).
  • Má uaslódálann tú do dhoiciméid sula gcuirfidh tú d’iarratas isteach agus roimh an sprioc-am le hiarratas a dhéanamh, ní mór duit iad a uaslódáil sa rannán ábhartha de do CV (faoi ‘Oideachas agus Oiliúint’ agus ‘Taithí oibre’).
  • Má uaslódálann tú do dhoiciméid tar éis duit d’iarratas a chur isteach agus tar éis an sprioc-ama le hiarratas a dhéanamh, ní mór duit iad a uaslódáil sa rannán ábhartha de d’iarratas (agus ní i do CV) (faoi ‘Oideachas agus Oiliúint’ agus ‘Taithí oibre’).

 

CONAS D’IARRATAS A ATHRÚ

Bíonn rochtain agat i gcónaí ar na hiarratais a chuir tú isteach agus ar na dréacht-iarratais a rinne tú sa rannán ‘Mo chuid iarratas’. Is féidir leat iad a scriosadh nó a mhodhnú am ar bith roimh an sprioc-am le hiarratais a dhéanamh.

Má chuireann tú d’iarratas in eagar tar éis duit é a chur isteach, ná déan dearmad ‘Cuir isteach’ a chliceáil arís. Mura ndéanfaidh tú sin, beidh stádas ‘dréacht’ ag d’iarratas i gcónaí agus ní chuirfear san áireamh é.

Tar éis an sprioc-ama le hiarratas a dhéanamh, is féidir leat d’iarratas a tharraingt siar tríd an bhfoirm ‘Scriosadh nó tarraingt siar a iarraidh’ sa rannán ‘Déan teagmháil linn’ sa chuntas. 

 

mo chuid iarratas

CONAS D’IARRATAS A THARRAINGT SIAR

Tar éis an sprioc-ama le hiarratas a dhéanamh, is féidir leat d’iarratas a tharraingt siar am ar bith. Téigh chuig an rannán ‘Déan teagmháil linn’ i do chuntas ar Thairseach Aonair na nIarrthóirí agus oscail an fhoirm ‘Scriosadh nó tarraingt siar a iarraidh’. Líon isteach an fhoirm agus cuir isteach í. Déanfar d’iarratas a tharraingt siar láithreach. Tabhair faoi deara go bhfuil an tarraingt siar críochnaitheach agus nach féidir í a chur ar ceal ina dhiaidh sin.

 

STÁDAIS ÉAGSÚLA IARRATAIS

DRÉACHT - Níor cuireadh isteach go fóill é (Scriostar dréacht-iarratais tar éis an sprioc-ama).

CURTHA AR CEAL MODHNAITHE - Tá d’iarratas tosaigh curtha in eagar agat, rud a chruthaíonn iarratas nua go huathoibríoch. Fágann sé sin go bhfuil an t-iarratas a rinne tú roimhe seo ‘curtha ar ceal modhnaithe’

BAILÍOCHTAITHE - Iarratais a cuireadh isteach.

AR SIÚL - Tar éis an sprioc-ama le hiarratas a dhéanamh, ‘AR SIÚL’ an stádas a bheidh ag na hiarratais a cuireadh isteach faoin sprioc-am.  

CURTHA AR CEAL - Is tú a chuir an t-iarratas ar ceal. 

NEAMHBHAILÍ - Níl d’iarratas bailí agus ní féidir é a chur san áireamh

DÍCHÁILITHE - Féadfar d’iarratas a dhícháiliú i gcomhréir leis an bhfógra comórtais 

TARRAINGTHE SIAR - Tarraingíodh siar an t-iarratas ar a iarraidh sin duit. Níl aon dul thar an stádas sin agus ní féidir é a chur ar ceal ina dhiaidh sin