Is mór ag EPSO an comhionannas, an éagsúlacht agus an cuimsiú, agus bíonn sé ar a dhícheall féachaint chuige go mbíonn na deiseanna céanna ag na hiarratasóirí uile, go gcaitear ar an dóigh chéanna leo agus go bhfuil an rochtain chéanna acu ar a chuid seirbhísí.

Má fheictear duit gur caitheadh leat ar dhóigh éagórach nó idirdhealaitheach i ngeall ar cheann de na saintréithe seo: gnéas, cine, dath, tionscnamh eitneach nó sóisialta, airíonna géiniteacha, teanga, reiligiún nó creideamh, tuairim pholaitiúil nó eile, ballraíocht i mionlach náisiúnta, maoin, breith, míchumas, aois nó treoshuíomh gnéasach, déan teagmháil linn láithreach chun do chuid tuairimí agus ábhar imní a chur in iúl dúinn.

Tugaimid an-aird ar an aiseolas a thugann iarratasóirí dúinn, mar is iad atá i gcroílár ár gcuid beartas agus cleachtas maidir le comhionannais, éagsúlacht agus cuimsiú. Féach An dóigh a gcinntíonn EPSO comhionannas deiseanna chun tuilleadh eolais a fháil faoin dóigh a gcuirimid na beartais sin i bhfeidhm.

Is í foireann síceolaithe saothair inmheánacha EPSO a fhorbraíonn trialacha EPSO go cúramach agus a dhéanann monatóireacht orthu, in éineacht le baill den bhord roghnúcháin a roghnaíodh go cúramach as measc na n-institiúidí den Aontas.

Déanann EPSO monatóireacht leanúnach ar na forbairtí agus na nuálaíochtaí is déanaí sa dearadh trialacha bunaithe ar thaighde eolaíoch, agus le blianta beaga anuas tá trialacha ar líne tugtha isteach aige ina phróisis roghnúcháin.

Is é príomhchuspóir thrialacha réasúnaíochta EPSO measúnú a dhéanamh ar na príomhinniúlachtaí réasúnaíochta is gá a bheith ag oifigigh de chuid an Aontais amach anseo, seachas an líon iarrthóirí a laghdú.

Is ar staidéir eolaíochta sheanbhunaithe atá na trialacha sin bunaithe agus tá luach ard tuarthach i gceist leo chun feidhmíocht na n-iarrthóirí sa phost amach anseo a thuar i gcomparáid le trialacha eolasbhunaithe amháin.

Cé nach dtugtar na ceisteanna céanna d’iarrthóirí sa chomórtas céanna, is ionann leibhéal deacrachta na dtrialacha a dhéanann gach iarrthóir, rud a chinntíonn go gcaitear go comhionann le gach duine.

Tá bailíocht agus iontaofacht na dtrialacha ilrogha ar ríomhaire dearbhaithe le cásdlí na Cúirte Breithiúnais, agus dhearbhaigh an Chúirt freisin go gcomhlíonann na trialacha sin prionsabal na córa comhionainne.

Ag an am céanna, le trialacha ar ríomhaire is féidir le EPSO measúnú a dhéanamh ar líon mór iarrthóirí laistigh de thréimhse ama an-ghearr ar bhealach éifeachtúil so-úsáidte.

Is éard a shainítear sa chreat inniúlachtaí na hinniúlachtaí a mheastar a bheith riachtanach chun aon phost ar leith a dhéanamh go héifeachtach laistigh de na hinstitiúidí agus na comhlachtaí den Aontas Eorpach ar a bhfreastalaíonn EPSO.

Is é EPSO a dhéanann measúnú ar chuid de na hinniúlachtaí sin le linn chéim an roghnúcháin, agus is iad na hinstitiúidí agus na comhlachtaí den Aontas Eorpach a dhéanann measúnú ar an gcuid eile le linn chéim na hearcaíochta.

I gcás próifílí níos speisialaithe, lorgaíonn institiúidí an Aontais iarrthóirí atá ardcháilithe ina réimse saineolais.

Bíonn eolas le fáil i gcónaí san fhógra comórtais faoi na hinniúlachtaí réimse-shonracha, agus faoi na trialacha lena ndéantar na hinniúlachtaí ginearálta agus na hinniúlachtaí réimse-shonracha a mheas.

Féach na hinniúlachtaí ginearálta agus na hancairí a ghabhann leo (is iad na ‘hancairí’ na táscairí a chuirtear san áireamh agus measúnú á dhéanamh ar inniúlacht ar leith).

Is féidir. Agus iarratas á dhéanamh ag na hiarrthóirí ar chomórtas EPSO, is féidir leo a roghnú cé acu is mian leo nó nach mian leo go gcomhroinnfí a sonraí teagmhála le húdaráis náisiúnta a mBallstáit den Aontas Eorpach.

Má thoilíonn na hiarrthóirí leis sin, féadfaidh EPSO a n-ainm, a seoladh ríomhphoist agus tagairt an chomórtais lena mbaineann a thabhairt amach ionas gur féidir leis na húdaráis náisiúnta teagmháil a dhéanamh leo chun tacaíocht a chur ar fáil a bhaineann leis an bpróiseas roghnúcháin agus leis an bpróiseas earcaíochta (mar shampla oiliúint, seisiúin eolais nó ábhair threoracha).

Tá an rogha sin roghnach agus níl feidhm aici ach amháin maidir leis an gcomórtas sonrach lena mbaineann. Ní mór d’iarrthóirí a rogha a chur in iúl gach uair a chuireann siad iarratas nua isteach.

Féadfaidh iarrthóirí a dtoiliú a tharraingt siar tráth ar bith ach teagmháil a dhéanamh leis na húdaráis náisiúnta ábhartha.

Déantar sonraí pearsanta a phróiseáil i gcomhréir leis na rialacha cosanta sonraí de chuid an Aontais is infheidhme.

Má fuair tú admháil lena chur in iúl go bhfuarthas d’iarraidh ar athbhreithniú, níor cheart duit meabhrúchán a sheoladh ach amháin má tá tréimhse ama shuntasach caite ó chuir tú isteach í.

D’fhéadfadh sé go nglacfadh sé roinnt seachtainí chun freagraí a thabhairt ar iarrataí ar athbhreithniú, ós rud é nach mór don bhord roghnúcháin teacht le chéile chun cinneadh a dhéanamh sular féidir freagra a thabhairt.

Má ligeann an bord roghnúcháin isteach sa chomórtas arís thú tar éis athbhreithniú a dhéanamh, cuirfear isteach arís thú ag an gcéim chéanna ónar cuireadh amach thú, is cuma cén chéim atá bainte amach sa chomórtas faoin tráth sin.

Ní mór do gach iarrthóir a chuireann isteach ar phróiseas roghnúcháin EPSO a bheith ina shaoránach de Bhallstát amháin den Aontas Eorpach ar a laghad.

• Más saoránach den Ríocht Aontaithe thú agus má tá an dara saoránacht agat le Ballstát den Aontas, féadfaidh tú iarratas a dhéanamh. 
• Mura bhfuil agat ach saoránacht leis an Ríocht Aontaithe, níl tú i dteideal iarratas a dhéanamh ar phróisis roghnúcháin EPSO ó tharraing an Ríocht Aontaithe siar as an Aontas Eorpach. 

Má fhaigheann tú saoránacht le Ballstát den Aontas ag tráth níos déanaí, is féidir leat do shaoránacht a nuashonrú i do chuntas EPSO agus iarratas a dhéanamh ar phróisis roghnúcháin amach anseo.

Féach freisin: Saoránacht an Aontais Eorpaigh – cearta agus deiseanna.

Is ar an ról agus ar an bpróifíl a bhraitheann na cáilíochtaí oideachais agus an taithí ghairmiúil is gá, agus sainítear iad sin i ngach fógra comórtais (le haghaidh baill foirne bhuana) nó i ngach glao ar léiriú spéise (le haghaidh baill foirne ar conradh). Is féidir leat féachaint ar shamplaí de na cineálacha cáilíochtaí a nglactar leo freisin.

Rialacha tábhachtacha:

• Ní mór na coinníollacha incháilitheachta uile a bheith comhlíonta faoi sprioc-am na n-iarratas, mura sonraítear a mhalairt san fhógra
• Ní chuirtear san áireamh ach taithí a fuarthas tar éis an dioplóma riachtanach a bhaint amach 
• Is ar bhonn na ndoiciméad tacaíochta a dhéanann an bord roghnúcháin an cinneadh deiridh maidir le hincháilitheacht. Beidh cinneadh an bhoird le feiceáil i do chuntas iarrthóra.

Cáilíochtaí oideachais

Bíonn na híoscheanglais oideachais éagsúil ag brath ar an gcatagóir foirne:

I gcás oifigigh bhuana:

• Leibhéal cúntóra: oideachas iar-mheánscoile, sin nó oideachas meánscoile agus taithí oibre iomchuí.
• Leibhéal riarthóra:  oideachas ollscoile críochnaithe a mhair trí bliana ar a laghad.

I gcás gníomhairí ar conradh:

• Grúpa Feidhme I: oideachas éigeantach.
• Grúpaí Feidhme II agus III: oideachas iar-mheánscoile, sin nó oideachas meánscoile agus taithí oibre iomchuí.
• Grúpa Feidhme IV: oideachas ollscoile críochnaithe a mhair trí bliana ar a laghad.

Taithí oibre

Teastaíonn taithí ghairmiúil ábhartha le haghaidh roinnt post.
Chun go gcuirfear do thaithí san áireamh, ní mór obair cheart ar íocaíocht a bheith i gceist, obair a dhéantar mar fhostaí nó mar sholáthraí seirbhíse, agus obair a bhaineann leis na dualgais a ndéantar cur síos orthu i ngach fógra comórtais (i gcás baill foirne bhuana) nó sa ghlao ar léiriú spéise (i gcás baill foirne ar conradh).

Na cineálacha taithí gairmiúla a nglactar leo

• Obair ar íocaíocht: gach cineál fostaíochta (fostaí, féinfhostaithe, saoroibrí, státseirbhíseach, etc.).
• Obair dheonach: i gcás ina gcúitítear ar bhealach éigin í agus ina bhfuil sí inchomparáide le hobair lánaimseartha, agus sa chás sin amháin.
• Intéirneachtaí: i gcás ina bhfuil íocaíocht ag gabháil leo, agus sa chás sin amháin.
• Seirbhís mhíleata: cuirtear seirbhís mhíleata san áireamh suas leis an tréimhse dhlíthiúil i do thír féin.
• Saoire mháithreachais/tuismitheora/altramais: ní chuirtear san áireamh í ach amháin má thógtar í le linn conradh gníomhach fostaíochta.
• Dochtúireacht (PhD): cuirtear san áireamh í mar 3 bliana de thaithí ar a mhéad má tá an PhD curtha i gcrích go rathúil.
• Obair pháirtaimseartha: is ar bhonn pro rata (e.g. 50% ar feadh 6 mhí = 3 mhí) a chuirtear san áireamh í.