Jekk inti tkun tqila waqt il-perjodu tal-applikazzjoni, tista’ tissottometti l-mistoqsijiet jew it-talbiet tiegħek għal aġġustamenti fil-formola online li se tintalab timla wara li tissottometti l-applikazzjoni tiegħek. Il-link għall-formola online se tkun disponibbli fl-applikazzjoni tiegħek. Tinsiex tehmeż iċ-ċertifikat mediku li jikkonferma d-data mistennija tal-ħlas jew id-data tal-ħlas f’każ li diġà wellidt.

Jekk tiskopri li inti tqila aktar tard jew twelled matul il-perjodu tal-proċedura ta’ selezzjoni, ikkuntattja lit-tim iddedikat tal-EPSO malajr kemm jista’ jkun permezz tal-indirizz tal-email epso-accessibility@ec.europa.eu, u pprovdi ċertifikat mediku li jikkonferma d-data mistennija tal-ħlas jew ta’ meta wellidt.

Ninfurmawk dwar l-għażliet possibbli wara li nistħarrġu r-rikjesta tiegħek.

L-EPSO jagħti importanza kbira lill-ugwaljanza, lid-diversità u lill-inklużjoni, u jagħmel kull sforz biex jirrispetta l-opportunitajiet indaqs, it-trattament ugwali u l-aċċess ugwali għall-applikanti.

Jekk tħoss li ġejt ittrattat b’mod inġust jew diskriminatorju minħabba waħda mill-karatteristiċi li ġejjin jew aktar: is-sess, ir-razza, il-kulur, l-oriġini etnika jew soċjali, il-karatteristiċi ġenetiċi, il-lingwa, ir-reliġjon jew it-twemmin, l-opinjoni politika jew xi opinjoni oħra, l-appartenenza għal minoranza nazzjonali, il-proprjetà, it-twelid, id-diżabilità, l-età jew l-orjentazzjoni sesswali, jekk jogħġbok ikkuntattjana minnufih biex taqsam l-osservazzjonijiet u t-tħassib tiegħek.

Aħna nagħtu attenzjoni mill-qrib lill-feedback li nirċievu mingħand l-applikanti, li huma fil-qalba tal-politiki u l-prassi tagħna dwar l-ugwaljanza, id-diversità u l-inklużjoni. Għal aktar informazzjoni dwar kif nipprattikaw dawn il-politiki, jekk jogħġbok ara Kif niżguraw l-opportunitajiet indaqs.

It-testijiet tal-EPSO huma żviluppati u mmonitorjati bir-reqqa mit-tim ta’ psikologi okkupazzjonali interni flimkien ma’ Membri tal-Bord ta’ Selezzjoni magħżulin b'attenzjoni mill-Istituzzjonijiet kollha tal-UE.

L-EPSO jimmonitorja b’mod kontinwu l-aħħar żviluppi u innovazzjonijiet fit-tfassil tat-testijiet abbażi tar-riċerka xjentifika u f’dawn l-aħħar snin introduċa ttestjar online fil-proċeduri ta’ selezzjoni tiegħu.

L-objettiv ewlieni tat-testijiet ta’ raġunament tal-EPSO hu li jiġu evalwati l-kapaċitajiet ta’ raġunament ewlenin għall-uffiċjali futuri kollha tal-UE, u mhux li jitnaqqsu n-numri tal-kandidati.

Dawn it-testijiet, li huma bbażati fuq studji xjentifiċi stabbiliti sew, għandhom valur għoli ta’ previżjoni għoli għall-prestazzjoni futura fl-impjieg meta mqabbla ma’ testijiet ibbażati purament fuq l-għarfien.

Minkejja li l-kandidati fl-istess kompetizzjoni ma jirċevux l-istess mistoqsijiet, il-livell ta’ diffikultà tat-testijiet individwali mogħtija lil kull kandidat hu identiku, u dan jiżgura trattament indaqs.

Il-validità u l-affidabilità tat-testijiet ibbażati fuq il-kompjuter b’għażla multipla ġiet ikkonfermata mill-każistika tal-Qorti tal-Ġustizzja Ewropea li kkonfermat ukoll li dawn it-testijiet huma konformi mal-prinċipju tat-trattament ġust u indaqs.

Fl-istess ħin, it-testijiet ibbażati fuq il-kompjuter jippermettu lill-EPSO jelvalwa n-numri kbar ta’ kandidati fi żmien qasir ħafna b’mod effiċjenti u faċli għall-utent.

Il-Qafas ta’ Kompetenza jiddefinixxi l-kompetenzi li huma kkunsidrati essenzjali għal prestazzjoni effettiva fi kwalunkwe impjieg partikolari, fl-istituzzjonijiet u l-korpi tal-UE li jservi l-EPSO.

Uħud minn dawn il-kompetenzi jiġu vvalutati mill-EPSO matul il-fażi tas-selezzjoni filwaqt li oħrajn jiġu vvalutati mill-istituzzjonijiet u l-korpi tal-UE nfushom matul il-fażi tar-reklutaġġ.

Għall-profili aktar speċjalizzati, l-Istituzzjonijiet tal-UE jfittxu kandidati li huma kkwalifikati ħafna fil-qasam tal-għarfien espert tagħhom.

Tista’ dejjem issib l-informazzjoni dwar il-kompetenzi relatati mal-qasam, kif ukoll it-testijiet li jevalwaw kemm il-kompetenzi ġenerali u dawk relatati mal-qasam fl-Avviż ta’ Kompetizzjoni.

Ikkonsulta l-kompetenzi ġenerali u l-ankri rispettivi tagħhom (“ankri” huma l-elementi meqjusa meta jiġu evalwati kompetenza partikolari).

Iva, meta japplikaw għal kompetizzjoni tal-EPSO, il-kandidati jistgħu jagħżlu jekk jixtiqux li d-dettalji ta’ kuntatt tagħhom jiġu kondiviżi mal-awtoritajiet nazzjonali tal-Istat Membru tal-UE tagħhom.

Jekk il-kandidati jaqblu, l-EPSO jista’ jittrażmetti isimhom, l-indirizz tal-email tagħhom u r-referenza tal-kompetizzjoni kkonċernata sabiex l-awtoritajiet nazzjonali jkunu jistgħu jikkuntattjawhom b’offerti ta’ appoġġ relatati mal-proċess tal-għażla u tar-reklutaġġ (bħal taħriġ, sessjonijiet ta’ informazzjoni jew materjali ta’ gwida).

Din l-għażla hija fakultattiva u tapplika biss għall-kompetizzjoni speċifika kkonċernata. Il-kandidati jridu jindikaw l-għażla tagħhom kull darba li jissottomettu applikazzjoni ġdida.

Il-kandidati jistgħu jirtiraw il-kunsens tagħhom fi kwalunkwe ħin billi jikkuntattjaw lill-awtoritajiet nazzjonali rilevanti.

L-ipproċessar tad-data personali jitwettaq skont ir-regoli tal-UE applikabbli dwar il-protezzjoni tad-data.

Jekk irċevejt konferma tar-riċevuta wara li tkun bgħatt it-talba tiegħek għal rieżami, ma għandekx tibgħat tfakkira sakemm ma jkunx għadda ammont ta’ żmien sinifikanti minn mindu ktibt.

It-tweġibiet għat-talbiet għal rieżami jistgħu jieħdu diversi ġimgħat, peress li l-Bord tas-Selezzjoni jrid jiltaqa’ biex jieħu deċiżjoni qabel ma tkun tista’ tinħareġ tweġiba.

Jekk il-Bord tas-Selezzjoni jaċċettak mill-ġdid wara li tkun saret ir-reviżjoni, inti tidħol mill-ġdid fil-proċedura tal-għażla fl-istadju fejn tkun ġejt eskluż qabel, irrispettivament minn fejn tkun waslet sadattant il-kompetizzjoni.